ټولګټو وزارت د کابل ۔ کندهار لویې لارې ترمیماتي سروې پیلوي

د ټولګټو وزارت د رهبرۍ په لارښوونه د کابل ۔ کندهار لویې لارې د ترمیماتي سروې لپاره د دې وزارت له بیلابیلو برخو څخه ٣٢ انجنیران غوره شوي دي، د انجنیرانو یاد ټیم به د افغان صداقت او باختر ګروپ ودانیزو شرکتونو سره په همغږۍ د کابل ۔ کندهار د لویې لارې ترمیماتي سروې پېلوي او اوسنی حالت به یې په هر اړخیز ډول سره څېړي. 

پر همدې اساس نن د ټولګټو وزارت د تخنیکي مرسیتال سید ادریس میر په مشرۍ غونډه ترسره شوه، چې په لارښوونه یې د انجنیرانو دا ټیم له یادو ودانیزو شرکتونو سره په همغږۍ د هیواد سویل لویدیځ ته د سفر پريکړه وسوه او د یادې مهمې لویې لارې ترمیماتي سروې به پیل کړي.

د کابل ۔ کندهار لویه لار؛ یو له مهمو ټرانزیټي لارو څخه ده چې د گڼو ولایتونو پر نښلون سربېره د سوداگریزو توکو په لیږد کې اغيزمن رول لري؛ خو له بده مرغه په تیرو کلونو کې د لوړ تناژ باروړنکو وسایطو لخوا ویجاړه شوي ده. 
د ټولګټو وزارت رسنیز دفتر