د ټولګټو وزارت مالي او اداري مرستیال د پکتیا له قومي مشرانو سره وکتل
د ټولګټو وزارت مالي او اداري مرستیال محترم ملا بخت الرحمن شرافت د پکتیا ولایت له یو شمیر قومي مشرانو سره د خپل کار په دفتر کې په داسې حال کې وکتل، چې د دې وزارت د مقام د دفتر رئیس محترم مفتي امیر عبدالله هم حضور درلود.
په دې لیدنه کې د پکتیا ولایت یو شمیر قومي مشرانو لومړی د ا.ا.ا د بریا مبارکي وویله او د پکتیا ولایت د سړکونو او پلونو په برخه کې یې خپلي ستونزې شریکې کړې او د ټولګټو وزارت د بشپړې پاملرنې غوښتنه يې وکړه.
یادو قومي مشرانو همدارنګه د ټولګټو وزارت له لوري د پکتیا ولایت د وزې ځدراڼ ولسوالۍ د ایوخیلو قوم په اړوند سیمه کې د نوې سړک د رغولو لپاره د بدیل مسیر غوښتنه وکړه، زیاته یې کړه، چې پر یاد مسیر د سیمې د خلکو شخصي ملکیتونه او استوګنیز کورونه شتون لري.
د ټولګټو وزارت مالي او اداري مرستیال محترم ملا بخت الرحمن شرافت د پکتیا ولایت قومي مشرانو ته ښه راغلاست وویل او د پکتیا ولایت لپاره یې د ټولګټو وزارت د راتلونکي پلانونو په اړه خبرې وکړې هغه همدارنګه د یادو قومي مشرانو ستونزې واوریدلی او ډاډ یې ورکړ چې، د یاد سړک د بدیل مسیر لپاره به د وزارت له رهبري او د ا.ا.ا له سیمه ییزو چارواکو سره خبرې اترې وکړي.
