لغمان: د ده زیارت پُل د ترمیم چارې ۹۰ سلنه بشپړې شوې دي
ټولګټو وزارت لخوا د لغمان ولایت د مرکز مهترلام ښار اړوند د ده زیارت پل د ترمیم او بیارغونې چارې ۹۰ سلنه بشپړي شوې دي.
دا پُل چې ۱۰۰ متره اوږدوالی او ۵ متره پلنوالی لري، د سختو سیلابونو له کبله ویجاړ شوی و، چې د سیمې اوسېدونکي یې د تګ راتګ پرمهال له ګڼو ترانسپورتي ستونزو سره مخ کړي وو.
د سیمې خلک د ټولګټو وزارت له لوري د دغه پُل په ترمیمولو او بیارغونه خوښ دي، چې د کار له بشپړېدو سره به یې د عمرزیي، غونډۍ، شمکت او ده زیارت سیمو په ګډون د ګڼو نورو کلیو د اوسېدونکو د تګ راتګ ستونزې هوارې شي او د لغمان مرکز مهترلام ښار ته به د پخوا په پرتله په اسانه او لنډه لار تګ راتګ وکړي.
