د هېواد په یو شمېر ولایتونو کې د وروستیو اورښتونو او سېلابونو له امله رسوبي مواد د سړک سطحې ته را پورته شوي دي، چې دا مهال یې پاک کاري په چټکۍ سره جریان لري

د ټولګټو وزارت رهبري په بغلان ولایت کې د راوتلو سېلابونو له امله چې ګڼ شمېر هېواد وال پکې په شهادت رسېدلي دي خواشیني څرګندوي او د الله ( ج ) د ستر دربار څخه شهیدانو ته د برین ( جنت )، ټپیانو ته د بشپړې روغتیا او د کورنۍ لپاره یې د جميل صبر غوښتنه کوي.
همدارنګه د ټولګټو وزرات سرپرست وزیر محترم الحاج ملا محمد عیسی ثاني د بغلان ولایت د ټولګټو ریاست په کاري ټیم او ماشینرۍ سربېره د کندز او سمنګان ولایتونو او سالنگونو د ساتنې او څارنې ریاستونو پرسونل او ماشینري هم د بغلان ولایت د سېلاب ځپلو خلکو سره د همکارۍ او د یاد ولایت د لارو د پاکولو په موخه سیمې ته لیږلي دي او د اړتیا په صورت کې به د بلخ ولایت د ټولګټو ریاست کاري ټیم او ماشینري هم سیمې ته ولېږدوي.
دغه راز ټولګتو وزارت تل هڅه کوي چې په هر حالت کې د هېوادوالو د سر او مال په خوندي ساتلو او ژغورلو کې نه ستړې کېدونکې همکاري وکړي.
د یاد ونې وړ ده، چې د وروستیو اورښتونو او سېلابونو له امله په بغلان، غور، سرپل، کاپیسا او سمنګان ولایتونو کې رسوبي مواد د سړک سطحې ته راپورته شوي دي، چې خلک يې د تګ راتګ پر مهال له ترافیکي ستونزو سره مخ کړي دي، دا مهال یې پاک کاري د اړوندو ولایتونو د ټولګټو ریاستونو د شته پرسونل او ماشینرۍ پرمټ په چټکۍ سره جریان لري