د ټولګټو وزارت د سرپرست وزير محترم الحاج ملا محمد عيسی ثاني په مشرۍ اداري غونډه ترسره شوه.
غونډه چې د قران عظیم الشان د مبارکو ايتونو په تلاوت پيل شوه، پکې د سرپرست وزير محترم الحاج ملا محمد عيسی ثاني ترڅنګ د ټولګټو وزارت تخنيکي مرستيال محترم مولوي عبدالکريم فاتح، د اوسپنيزې کرښې مرستيال محترم الحاج ملا بخت الرحمن شرافت او ټولو رئيسانو ګډون کړی وو.
په پیل کې سرپرست وزير محترم الحاج ملا محمد عيسی ثاني وويل: «د وزارت ټولې چارې باید په قانوني ډول او پر وخت ترسره شي او په چارو کې دې د هر ډول ځنډ او خنډ مخه ونیول شي.»
نوموړي زياته کړه، هڅه دې وشي، ترڅو د وزارت د سږکال په پلان کې شاملې ټولې پروژې پر وخت او ښه کيفيت تطبيق شي.
هغه د غونډې پرمهال مسوولينو ته لارښوونه وکړه، چې په ټولو چارو ترسره کولو جدي اوسي او په ښه توګه له خپلو کارونو څخه څارنه وکړي.
همداراز په غونډه کې د ګډونوالو له لورې د ټولګټو وزارت او اوسپنې پټلۍ اړوند د ټولو پروژو د تخنیکي، تدارکاتي، ډیزاین او سروې چارو د ښه تنظيم او تطبيق په موخه هم مفصل بحثونه ترسره او لازم تصاميم ونيول شول.
