د قیصار – لامان حلقوي سړک د پنځم لاټ د جوړولو چارې د ټولګټو وزارت له لوري روانې دي
د قیصار – لامان ۲۵ کیلومتره حلقوي سړک د پنځم لاټ اساسي رغونې پروژه د ۱ میلیارد او ۴۵۰ میلیونه افغانیو په ارزښت د ټولګټو وزارت او خصوصي سکټور ترمنځ قرارداد شوې ده او دا مهال یې د رغونې چارې عملاً جریان لري.
دغه سړک ۱۲ متره پلنوالی لري، چې ۷ متره یې اسفالتي برخه او د سړک دواړو غاړو ته ۲.۵ متره شولډر لري. همدارنګه د دې سړک په اوږدو کې د ۶۰، ۹۰ او ۱۸۰ مترو په اوږدوالي درې لوی پلونه، ۶۸ پایې پلګوټي، ۲۷۰ متره استنادي دېوالونه، ۱۶۲۰ متره د سړک غاړې ویالې او د سړک دواړو خواوو ته کانکریټي پلي لارې هم جوړېږي.
د یادونې وړ ده چې، د ټولګټو وزارت وزار له لوري د یاد سړک د درېیم لاټ د رغونې چارې هم د ۵۰ کیلومتره په اوږدوالي سره پیل شوې دي او عملاًجریان لري.
د قیصار – لامان حلقوي سړک د افغانستان د حلقوي لویې لارې یوه مهمه او بنسټیزه برخه شمیرل کیږي، چې د هېواد شمالي او شمال ختیځ ولایتونه د لوېدیځ او سوېل لوېدیځو سیمو سره نښلوي. دغه سړک د اقتصادي فعالیتونو د ودې او پراختیا، د سوداګریزو توکو د لېږد رالېږد د اسانتیا، او د سفر د وخت او لګښتونو د کمښت په برخه کې مهم رول لري.
