د ټولګټو وزارت محترم وزیر د کابل – جلال آباد لویې لارې د دویم لین سړک له رغنیزو چارو څخه لیدنه وکړه
د ټولګټو وزارت وزیر محترم الحاج ملا محمد عیسی ثاني د کابل – جلال آباد لویې لارې د دویم لین سړک د کابل ولايت له لوري د ۳۲ کیلومتره برخې څخه، چې دامهال یې تر ۱۶ کیلومترۍ پورې رغنیزې چارې جریان لري په داسې حال کې لیدنه وکړه، چې د یاد وزارت تخنیکي ټيم یې هم ملتیا کوله.
د یادې لیدنې په لړ کې د ټولکټو وزارت محترم وزیر د یاد سړک تطبیق کوونکو ټیمونو او د قراردادي شرکت مسئولینو ته د کار د چټکتیا، غوره کیفیت او پروخت د بشپړولو په هکله لازمې لارښوونې وکړې او د قراردادي شرکت مسؤلانو هم ډاډ ورکړ، چې د یادې پروژې چارې به په غوره کیفیت، تخنیکي مشخصاتو او ټاکلي وخت پای ته ورسوي.
د کابل – جلال اباد لویې لارې یاده برخه، چې د کابل له لوري د پخواني کانکریټي سړک په دوام موقعیت لري. په دې برخه کې، د یوه پایه پل او ۷۶ پایه پلګوټو د جوړولو چارې شاملې دي. له دې جملې څخه د ۷ پایه پلګوټو د جوړولو چارې بشپړې شوې او د پاتې پلګوټو د جوړولو چارې هم په چټکۍ سره روانې دي.
د یادونې وړده، چې د ننګرهار ولایت له لوري د کابل – جلال آباد دویم لین سړک د ۲۲ کیلومتره برخې چارې له وړاندې پیل شوې وې او د یادې برخې په دوام یې د ۲۰ کيلومتره برخې رغنیزې چارې هم سږ کال قرارداد شوې دې او دامهال د دواړو برخو چارې عملاً جریان لري.
د ا.ا.ا د ټولګټو وزارت د یادې لویې لارې اقتصادي او ټرانزیټي اهميت ته په کتو، د درنو هېوادوالو د ټرانسپورتي ستونزو د حل په موخه د يادې لويې لارې د دويم لين سړک د اساسي رغونې کار پيل کړی دی، چې په بشپړېدو سره به یې د درنو هېواد والو او سوداګرو ستونزې تر ډېره هوارې شي.
