د کابل ښار حلقوي سړک جوړولو د کار ګړينديتوب په تړاو جلسه ترسره شوه
د کابل ښار حلقوي سړک جوړولو د کار ګړينديتوب په تړاو جلسه ترسره شوه
په دې جلسه کې د افغانستان اوسپنې پټلۍ خپلواکې ادارې عمومي رئيس او د ټولګټو وزارت سرپرست محمد يما شمس په افغانستان کې د اسلامي پراختيايي بانک استازي عطاء الرحمن دراني سره د کابل ښار حلقوي سړک جوړولو د کار په ګړنديتوب ټينګار وکړ.
په دې جلسه کې ښاغلي دراني د ټولګټو وزارت د نويو پروژو تمويل لپاره د اسلامي پراختيايي بانک ژمنه ياده کړه، د هغو پروژو مشخص کولو غوښتنه يې وکړه چې د سروې او ډيزاين کار يې بشپړ شوى او د استملاک ستونزه ونلري تر څو د اسلامي پراختيايي بانک لخوا تمويل او په لنډه موده کې يې چارې بشپړې شي.
د ټولګټو وزارت سرپرست د اسلامي پراختيايي بانک له مرستو او د افغان ولس او افغانستان حکومت سره د نويو پروژو د تمويل په پار د مننې ترڅنګ، د ټولګټو وزارت تر کار لاندې پروژو د بشپړيدو په لومړيتوبونو باندې، د وزارت په ټولو برخو کې اصلاحات راوستو، د کاري ظرفيت په لوړيدو په ځانګړې توګه تخنيکي او ساتنې او څارنې برخه کې او د مراقبتي ټيمونو په پياوړي کولو باندې مفصلې خبرې وکړې.
هغه زياته کړه په اخيرو کلونو کې د ١٠ زرو څخه زيات سړک اسفالټ شوى دى د هغه ساتنه او څارنه زموږ د کار لومړيتوب دى او په راتلونکو درې کلونو کې به د ټکنالوجۍ څخه په ګټې اخيستې مطابق د معيارونو د سړکونو ساتنه او څارنه ترسره کيږي تر څو د دې ملي شتمنۍ د ويجاړۍ مخه ونيول شي.
د ټولګټو وزارت سرپرست وويل، د کومو پروژو سروې او ډيزاين جې بشپړ شوى او د اقتصادي پلوه د ټرانزيټ، سوداګرۍ او زراعت په برخه کې مهمې دي او د استملاک ستونزه ونلري پروپوزل به يې په نږدې راتلونکې کې د اسلامي پراختيايي بانک سره شريک کړاى شي.
ټولګټو وزارت ـ کابل
چنګاښ ٣١مه، ١٣٩٩
