په سیدکرم ولسوالۍ کې د یوه سړک رغنیزې چارې ۶۰ سلنه پرمختګ لري
دا کانکریټي سړک چې ۴.۵ کیلومتره اوږدوالی لري، د پکتیا ولایت د سیدکرم ولسوالۍ د لوی خوړ له سرک څخه تر مچلغو کلي پورې غځیدلی، چې اوس مهال یې رغنیز کار له ۶۰ سلنه پرمختګ سره په چټکۍ دوام لري.
د کانکریټي سړک یاده پروژه د ټولګټو وزارت له لوري له څلورو سیمه ییزو پراختیايي شوراګانو سره تړون شوې، چې مالي لګښت یې د هېواد له پراختیایي بودیجې څخه ورکول کېږي.
د دې سړک د رغنیز کار په بهیر کې د سیمې اوسېدونکو ته په مستقیم او غیر مستقیم ډول ۲۰۴۱۵ ورځې رامنځته شوي چې د کار له بشپړېدو سره به د ګوډ منګل، حاجي عزیز، میاداد، کرکی خېل او مچلغو کلیو اوسېدونکي د ګردیز- سیدکرم له عمومي سړک سره ونښلول شي.
د ټولګټو وزارت له لوري د پخو او اساسي سړکونو ترڅنګ د هېواد په لرو پرتو سیمو کې د جغلي سړکونو پراختیایي چارې هم روانې دي، چې د خلکو د ټرانسپورټي ستونزو د هوارې ترڅنګ یې د سیمې اوسېدونکو ته ګڼ کاري فرصتونه هم رامنځته کړي دي.
