د بلخ په مارمول ولسوالۍ کې د ۸.۹۱ کیلومتره سړک رغنیز کار دوام لري
دا سړک چې ټولټال ۸.۹۱ کیلومتره اوږدوالی لري، ۴.۲۶ کیلومتره یې په کانکریټي او ۴.۷ کیلومتره نور یې په جغلي شکل سره د مارمول ولسوالۍ له مرکز څخه د دې ولسوالۍ تر باغ چاه کلي پورې غځیږي، چې اوس مهال یې رغنیز کار له ۶.۵ سلنه کاري پرمختګ سره دوام لري.
دا پروژه د ټولګټو وزارت له لوري له یوه خصوصي ودانیز شرکت سره، د څه باندې ۷۲ میلیون افغاینو په ارزښت تړون شوي، چې مالي لګښت یې د هیواد له ملي بودیجې څخه ورکول کیږي.
د سړکونو د رغښت په دې پروژه کې به د اړوندو سیمو وګړو ته په مستقیم او غیر مستقیم ډول ۱۱۷۰ کاري ورځې رامنځته شي او هم به د جوړیدا په صورت کې ترې ۱۴زره تنه په مستقیم او ۱۶ زره تنه نور به ترې په غیر مستقیم ډول ګټه واخلي.
د یادولو وړه ده، چې د دې پروژې له بشپړیدا سره به د مارمول ولسوالۍ ګڼ کلي د دې ولسوالۍ مرکز سره ونښلي او د کرنیزو توکو د انتقال، روغتیایي او ښوونیزو مرکزونو ته د لاس رسي زمینه به تر پخوا اسانه او ښه شي.
