د ترستکو میدلایست آلمانی شرکت په افغانستان کې د سړکونو رغونې په برخه کې د ۴۰۰ میلیونه امریکایي ډالرو په ارزښت پانګونې ته ليوالتیا لري
د ټولګټو وزارت سرپرست وزیر محترم الحاج ملا محمد عیسی ثاني د ترستکو میدل ایست آلماني شرکت له مسؤل محترم دوکتور محمد درخشان سره په داسې حال کې وکتل چې د یاد وزارت د سړکونو د ساتنې او څارنې او د اوسپنیزې کرښې د مرستیالانو هم شتون درلود.
په یاده لیدنه کې د ترستکو میدل ایست شرکت مسئول د ټولګټو وزارت د سرپرست وزير سره له ليدنې څخه خوښي څرګنده کړه او زياته يې کړه، چې موږ غواړو په افغانستان کې د سړکونو د جوړولو په برخه کې د کانونو په بدل کې د ۴۰۰ میلیونه امریکایي ډالرو په ارزښت پانګونه وکړو او لیواله یو چې د ا.ا.ا د ټولګټو وزارت سره په ګډه کار وکړو.
د ټولګټو وزارت سرپرست وزیر د ترستکو میدل ایست شرکت مسؤل ته د ښه راغلاست تر څنګ د دوی له ليوالتيا څخه مننه وکړه او زياته يې کړه چې دامهال په افغانستان کې تر بل هر وخت امنيت ښه شوی او په بېلا بېلو برخو په ځانګړې توګه د سړکونو په برخه کې کورنيو او بهرنيو پانګوالو ته د پانګونې بشپړه زمينه برابره ده.
دغه راز د ټولګټو وزارت سرپرست وزیر زیاته کړه د غور – هرات او بادغیس – فاریاب سړکونو چې د افغانستان له مهمو سړکونو څخه شمېرل کیږي، یاد وزارت یې د رغولو پلان لري، په دې تړاو به د ا.ا.ا له رهبرۍ سره له سلا ( مشورې ) تر سره شي او د رهبرۍ له منظورۍ وروسته به له یادو سړکونو څخه د یو سړک د رغونې کار له تاسو سره قرارداد کړل شي.
دا په داسې حال کې ده، چې په دې وروستيو کې يو شمېر نورو بهرنیو پانګوالو هم د هيواد د سړکونو او اوسپنيزې کرښې په برخه کې پانګونې ته ليوالتيا ښودلې وه.
