د سالنګونو پر لویه لار د وسایطو تګ راتګ په نورمال ډول جریان لري
د سالنګونو لویه لار چې تېره ورځ د تیزې واورې د اورښت دوامداره طوفان او د لیدلو ساحې د کمښت له امله د څو ساعتونو لپاره د ترافیکو پر مخ تړل شوې وه، له نیکه مرغه د سالنګونو لویې لارې د ساتنې او څارنې ریاست د شته پرسونل او ماشینرۍ په دوامداره هڅو بېرته د ترافیکو پرمخ پرانیستل شوه او دامهال په یاده لویه لار د وسایطو تګ راتګ په نورمال ډول جریانی لري.
د سالنګونو د ساتنې او څارنی ریاست د کارکوونکو له لوري لا هم په واورينو کنګل شویو سیمو کې د خاورې او مالګې شیندل جریان لري.
د ټولگټو وزارت له ګرانو هېوادوالو او درنو موټرچلوونکو څخه د دوی د خونديتوب لپاره غوښتنه کوي، چې د دې لویې لارې څخه په تېرېدو سره دې د وسایطو لپاره چین (ځنځیر) ګرم ژمني توکي او تجهیزات له ځان سره ولري، ترافیکي قوانین مراعت او له بشپړ احتیاط څخه کار واخلي، او د سالنګونو د موظفینو لارښوونو ته جدي پاملرنه وکړي.
د يادونې وړ ده، چې د هېواد په يو شمېر نورو ولايتونو کې هم د واورې اورښت جريان درلود، خو له نيکه مرغه په اړوندو ولايتونو کې لويې لارې او سړکونه د ترافيکو پر مخ پرانيستې دي.
۱۰قوس د ټولګټو وزارت رسنیز
