د غزني د قرباغ ـ جاغوري سړک رغنیز کار چټک شو
دا سړک چې ۳۰.۳۶۷ کیلومتره اوږدوالی او ۶ متره پلنوالی لري، د غزني ولایت له قرباغ ولسوالۍ څخه پیل او د دې ولایت تر جاغوري ولسوالۍ پورې غځېږي، چې اوس مهال یې رغنیزې چارې له ۴۲ سلنه کاري پرمختګ سره دوام لري.
د یادې پروژې رغنیز کار چې د امنیتي ستونزو له کبله په ځنډ سره روان و، اوس مهال د قراردادي شرکت له لوري له ټولګټو وزارت سره په همغږۍ او د سیمې د خلکو او ځايي ادارې په بشپړې همکارۍ سره چټک شوی دی.
دا پروژه د ټولګټو وزارت له لوري له یوه خصوصي ودانیز شرکت سره تړون شوي، چې مالي لګښت یې د هېواد له ملي بودیجې څخه ورکول کېږي.
د دې سړک د رغنیز کار له بشپړیدو سره به، نه یوازې د غزني ولایت د قرباغ او جاغوري ولسوالۍ سره ونښلي بلکی د دې ولایت اجرستان، مالستان، جغتو او قرباغ ولسوالۍ به هم له مرکز غزني ونښلوي او د یادو ولسوالیو د اوسېدونکو ټرانسپورټي ستونزې به تر ډېره بریده هوارې کړي.
