د هېواد د ترانسپورتي شبکې د پراختیا او د اقتصادي ودې په لور یو بل مهم ګام د کونړ – نورستان سړک د اسفالټ اچونې چارې پیل شوې
د ټولګټو وزارت د هېواد د ترانسپورتي شبکې د پراختیا او د لرې پرتو سیمو د نښلولو په موخه، د کونړ–نورستان سړک د اسفالټ اچونې چارې د نورستان ولایت له لوري د کونړ پر لور پیل کړې دي، چې د خلګو د تګ راتګ او اقتصادي ودې لپاره مهم ګام بلل کېږي.
د کونړ – نورستان سړک د رغونې چارې په دریوو لاټونو وېشل شوې دي، لومړی او دویم لاټ یې، چې ټولټال ۲۲.۵ کیلومتره اوږد والی لري دا مهال یې د اسفالټ اچونې چارې پیل شوې.
د کونړ – نورستان پروژې لومړی لاټ ۱۱.۷ کیلومتره اوږدوالی لري، چې د اساسي رغونې چارې یي له خصوصي سکتور سره د څه باندې۵۸۰ میلیونه افغانیو په ارزښت قراردرداد شوې دي، چې په اوږدو کې یې د ۳۵ پایو پلګوټو او ۲۳۷۸ متره استنادي دیوالونو د رغونې کار هم شامل دي.
همدارنګه، د دغې پروژې دویم لاټ ۱۰.۸ کیلومتره اوږدوالی لري، او د اساسي رغونې چارې د څه باندې ۲۹۶ میلیونه افغانیو په ارزښت له خصوصي سکتور سره قرارداد شوې دي، چې د یادې برخې په اوږدو کې د ۳۰ پایو پلګوټو او ۱۲۴۱ متره استنادي دیوالو نو د رغونې کار هم شامل دی.
دغه راز، د کونړ – نورستان سړک درېیم لاټ، چې ۸۴ کیلومتره اوږدوالی لري، او عملي چارې یې جریان لري.
د نورستان – کونړ سړک د بشپړېدو سره به د خلکو ترانسپورتي ستونزې راکمې شي او د کرنیزو محصولاتو او سوداګریزو توکو په هوسا انتقال کې به د پام وړ آسانتیاوې رامنځ ته شي.
د یادونې وړ ده، چې د سړکونو معیاري کول د هېواد د اقتصادي ودې له مهمو بنسټونو څخه ګڼل کېږي، ځکه چې د ترانسپورتي شبکې پراختیا د پانګونې، سوداګرۍ، سیاحت او سیمه ییز اتصال لپاره مناسب شرایط برابروي.
