د وزیر ژوندلیک
د ټولګټو وزیر ښاغلی انجنېر نجیب الله یمین لنډ ژوند لیک
انجنیر نجیب الله یمین په ۱۳۵۳ لمریز کال په لوګر ولایت کې زیږیدلی دی، لومړنۍ، منځنۍ او د لیسې دورې زده کړې يې د غازي امین الله لوګري او غلام محمد نیازي په عالي لیسو کې ترسره کړي، په ۱۳۷۴ لمریز کال کې د کابل پوهنتون د انجنیري پوهنځي ته شامل او په ۱۳۷۹ لمریز کال یې له دې پوهنځي څخه د سیول انجینری په برخه کې د لسانس سند ترلاسه کړ. ښاغلي یمین د ماسترۍ سند په ۱۳۸۷ لمریز کال د تایلنډ شاهي هیواد د مهیډول پوهنتون څخه د طبیعي زیرمو د مدیریت په برخه کې ترلاسه کړی دی. په ۱۳۹۳ لمریز کال کې یې د امریکې متحده ایالاتو د مشیګن ایالتي پوهنتون څخه د نړیوالې پراختیا په چوکات کی د طبیعي زیرمو د مدیریت په برخه کې د فوق ماستري سند ترلاسه کړی دی.
ښاغلی یمین د هیواد یو ځوان، متخصص، متعهد او په کارپوه کدر دی چې څه باندې شل کاله یې په بیلابیلو کورنیو او نړیوالو ادارو کې کار کړی او مسلکي او تخصصي کاري تجربې یې تر لاسه کړي دي. له ډلې یې کولی شو د نړیوال بانک، د آسیا پرمختیایي بانک، ملګرو ملتونو سازمان، د آلمان د پراختیایي همکاریو ادارې، د اوبو او انرژۍ وزارت، د کلیو پراختیا او بیا رغونې وزارت، د چاپیریال ساتنې ملي ادارې او په ولسمشری ماڼۍ کې د هغه له دندو یادونه وکړو چې پر بېلابېلو موقفونو پاته شوي دي.
ښاغلي یمین د خپلې شل کلنې مسلکي او تخصصي کاري تجربې په لړ کې د سیمې او نړۍ له څه باندې شلو هیوادونو څخه دلیدنې تر څنګه کاري تجربه تر لاسه کړې او په نړیوالو جایزو او ملی تقدیر نامو لکه لومړۍ، دوهمه او دریمه درجه ستاینلیکونو باندې ویاړل شوی دی.
ښاغلی یمین د افغانستان د اسلامي جمهوري دولت د ولسمشر له لوري د ۱۳۹۹ لمریز کال د تلي په ۱۷مه نیټه د ځانګړي فرمان/حکم پر بنسټ د ټولګټو وزارت د سرپرست او نوماند وزیر په توګه وټاکل شو چې د همدې کال د لیندۍ میاشتې پر ۱۰مه نیټه یې له ولسي جرګې څخه د باور ۱۴۹ رایې تر لاسه کړي او دټولګټو د وزیر په توګه بریالی شو.