د ټولګټو وزارت د اوسپنې پټلۍ مرستیال او مل پلاوي ترکمنستان هېواد ته سفر وکړ
د ا.ا.ا د ټولګټو وزارت د اوسپنيزې کرښې د مرستيال محترم مولوي محمد اسحاق صاحبزاده په مشرۍ تخنیکي پلاوي ترکمنستان هېواد ته د ريلي همکاريو د پراختيا په موخه سفر وکړ.
په یاد سفر کې د (۷) ميليونو امريکايي ډالرو په ارزښت يو تفاهم ليک د هرات-تورغونډۍ سټېشن د پراختیا او د آقينې–اندخوی د پاتې ۱۰ کیلومتره اوسپنیزې کرښې بشپړول او د اندخوی–شبرغان د ۵۵ کیلومتره اوسپنیزې کرښې د سروې او تفصيلي ډیزاین اړوند دوه تفاهم ليکونه د ترکمنستان هېواد د اوسپنې پټلۍ ادارې سره لاسلیک شول.
ټاکل شوې ده، چې د يادو تفاهم ليکونو تر لاسليک کولو وروسته په نږدې راتلونکې کې د ترکمنستان او افغانستان ترمنځ د يادو دريو پروژو پراختيايي قراردادونه لاسليک شي، ترڅو عملي چارې يې پيل شي.
د ا.ا.ا ته د افغانستان د اوسپنې پټلۍ شبکې رغول، نښلول او معياري کول په لوړه کچه لومړيتوب لري او ټولګټو وزارت هڅه کوي، چې د افغانستان د اوسپنې پټلۍ د پراختيا لپاره په سيمه ييزه او نړيواله کچه دوه اړخيزې همکارۍ راجلب کړي.
دا په داسې حال کې ده، چې له دې وړاندې د ا.ا.ا د ټولګټو وزارت د اوسپنيزې کرښې مرستيال ايران، ازبيکستان او ترکیې هېوادونو ته هم د دوه اړخيزو اړيکو او ريلي همکاريو د پراختيا په موخه سفرونه ترسره کړي وو.
