د ټولګټو وزارت سرپرست وزیر د شاه ولي کوټ – ترینکوټ عمومي سړک او کندهار - هرات لويې لارې له کاري بهیر څخه لیدنه وکړه
د ټولګټو وزارت سرپرست وزیر محترم الحاج ملا محمد عیسی ثاني کندهار ولایت ته د خپل کاري سفر په ترڅ کې د شاه ولي کوټ – ترینکوټ عمومي سړک او کندهار - هرات لويې لارې له رغنیزو چارو څخه په داسې حال کې لیدنه وکړه چې د یاد ولایت د ټولګټو رئیس محترم مولوي عبدالهادي یعقوب او د لویدېځ زون د پروژو مسئول محترم انجنیر شیرحسن خوشیوال هم شتون درلود.
د شاه ولي کوټ – ترینکوټ عمومي سړک چې ۴۵ کیلومتره اوږدوالی لري او د ۵۲ پایو پلګوټو د ترمیم کار هم پکې شامل دی د کندهار ولایت د ټولګټو ریاست د شته پرسونل او ماشینرۍ څخه په ګټه اخیستنې ترمیم او بیارغول کیږي چې مالي لګښت یې د عالیقدر امیرالمؤمنین حفظه الله له دفتر څخه ورکول کیږي.
همدارنګه د ټولګټو وزارت سرپرست وزیر د کندهار – هرات لويې لارې اړوند د باغ پل – لشکرګاه دوراهي سړک له کاري بهیر څخه هم لیدنه وکړه او د پروژې فني او تخنیکي ټیمونو ته یې دنده ورکړه چې د یاد سړک له کاري بهیر څخه جدي څارنه او پاملرنه وکړي تر څو په خپل وخت د يادې پروژې چارې بشپړ ې او د خلکو ترانسپورتي ستونزي هوارې شي.
دغه سړک چې ۷۸ کیلو متره اوږدوالی لري د کندهار ولایت له باغ پل څخه پیل د یاد ولایت له ژېړۍ او میوند ولسوالیو څخه په تیرېدو تر هلمند دوراهي پورې رسیږي د یاد سړک په اوږدو کې د یو شمېر پلګوټو او واشونو رغول هم شامل دي چې د ترمیم او بیا رغونې چارې یې د ټولګټو وزرات او خصوصي شرکت ترمنځ د معدن په بدل کې قرارداد شوي دي.
د دغو پروژو په تطبيق سره به د خلکو ترانسپورتي ستونزې د پخوا په پرتله هوارې شي او خلک به په اسانۍ سره تګ راتګ وکړي.
