د چاريکار ښار څلورلاري د نښلونکي سړک د آسفالت(قير اچونې) کار د څه باندې ۴۵ ميلیونه افغانيو په ارزښت بشپړ او ګټې اخيستنې ته وسپارل شو
د چاريکار ښار څلورلاري د نښلونکي سړک د ( کابل - شمال) مسير د بیا رغونې کار چې څو میاشتې وړاندې د ټولګټو وزارت له لوري د څه باندې ۴۵ ميليونه افغانيو په ارزښت پیل شوی و، دا مهال يې کار بشپړ او نن ورځ د پروان ولايت د ټولګټو د رئیس محترم مولوي عزت الله عارف او يو شمېر سيمه ييزو مسئولينو په شتون افتتاح او ګټې اخيستنې ته وسپارل شو.
د پروان ولايت د چاريکار ښار څلورلاري سړک په ټوليزه توګه ۱۱۱۵۰ متره مربع مساحت لري چې د دوه پايې پلونو او د سړک غاړې ويالو د بيا رغونې کار هم پکې شامل و، چې د دواړو لينو په ۲۰ متره ټوليز پلنوالي سره يې کار بشپړ شو.
د يادې پروژې په بشپړېدو سره د کابل - شمال لويې لارې د چاريکار ښار مسیر د ترافیکو پر مخ پرانیستل شوی دی او د مسافر وړونکو وسايطو په تګ راتګ او تجارتي توکو په لېږد رالېږد کې به بشپړې اسانتياوې رامنځته شي.
ټولګټو وزارت تل هڅه کوي چې د هېواد د لويو لارو او سړکونو په رغونې، ترميم او بیا رغونې سره درنو هېوادوالو ته بشپړې اسانتياوې رامنځته کړي.
