د کابل ۔ کندهار لویې لارې اړوند د شهر صفا ۔ مانجه سړک د قیر اچونې کار پیل شو
د ټولګټو وزارت د سرپرست محترم الحاج ملا محمد عیسی ثاني، په لارښوونه د دغه وزارت تخنیکي رئیسانو هر یوه:
د سړکونو د ساتنې او څارنې رئیس انجنیر عبدالواسع صابري، د لابراتوارونو رئیس انجنير پادشاه قيامي او د پروژو د تضمين کیفیت رئیس انجنير ذبيح الله نادري، جنوب غربي ولایتونو ته د خپل سفر په ترڅ کې؛ په زابل ولایت کې د کابل - کندهار لویې لارې اړوند؛ د شهر صفا - مانجه سړک پروژې د ترميم او بیا رغونې کار څخه له نیږدې لیدنه وکړه او د یادې برخې د قیر اچونې کار یې پیل کړ.
د يادونې وړ ده، چې د کابل - کندهار لويې لارې اړوند د شهر صفا - مانجه سړک، ٣٧.٥ کیلومتره اوږدوالی لري، چې ۴ پايې پلچکونه، تر ٢٠٠ متره زیات معبرونه او ١١٠ متره د استنادي دیوالونه ترمیم هم پکې شامل دي.
د سړک دغه پروژه، د ټولګټو وزارت لهلوري له یوه خصوصي ساختماني او سړک جوړونې شرکت سره د معادن په بدل کې قرارداد شوې، چې دا مهال یې د قیر اچونې کار دوام لري.
