د کندوز له سر دورې بازار څخه تر هوايي ډګر پورې د سړک بې کیفیته برخې بیرته په اساسي ډول جوړیږي
ټولګټو وزارت په جدیت سره قراردادي ته سپارښتنه کړې چې د کندوز ولايت له سردوره بازار څخه تر هوايې ډګر پورې د ۵.۷۶ کیلو متره سړک تخريب شوي برخې بيرته په بنسټیز ډول ورغوي.
د ټولګټو وزارت رهبرۍ د خلکو تر شکایتونو وروسته سیمې ته د سړک د ارزونې لپاره تخنیکي ټیمونه استولي و چې په پایله کې د سړک ستونزه په یخه هوا کې د قیر اچونې له کبله جوته شوې او له همدې کبله په ځينو برخو کې اسفالټ اوښتی یا (Segregation) رامنځته شوی دی.
ټولګټو وزارت قراردادي شرکت مکلف کړی چې پر بې کیفیته ځایونو کې یو لایه نور قیر یا ( wearing course) واچوي او د سړک ستونزه په بنسټيز ډول هواره کړي.
د دې سړک د جوړېدو چارې اوس مهال په ګړندۍ توګه روانې دي چې په نږدې ورځو کې به بشپړې او د سړک ستونزه به هواره شي.
