نېمرزو: د کنګ ولسوالۍ په سرشیله سیمه کې د ۳۰۰ متره پُل رغنیزې چارې بېرته پیل شوې
د نېمروز ولایت د کنګ ولسوالۍ په سرشیله سیمه کې د یوه پایه اوسپنیز ۳۰۰ متره کانکريټي پُل، چې رغنیزې چارې یې د ورستیو بدلونونو له امله په ټپه درېدلي وې، اوس د ټولګټو وزارت د کلیو د لار جوړونې ملي پروګرام لخوا بېرته پیل شوې.
دا پُل چې ۳۰۰ متره اوږدوالی او ۱۱ متره پلنوالی لري، د نیمروز ولایت د کنګ ولسوالۍ په سرشیله سیمه کې، د زرنج – کنګ ولسوالۍ پر سړک، د هلمند سیند په فرعي ښاخ جوړیږي، چې د نیمروز ولایت مرکز زرنج ښار له کنګ ولسوالۍ سره نښلوي.
یاد پُل دواړو لورو ته ۳۴۰ متره اسفالټ سړک او ۴۰۰ متره محافظوي دیوال هم لري، چې رغنیزې چارې یې له وړاندې ۸۰ سلنه بشپړي شوې وې او پاته رغنیزې کار یې د سیمې د خلکو په غوښتنه د دغه وزارت له لوري بیا پیل او دا مهال جریان لري.
د دې پروژې رغنیز کار د ټولګټو وزارت او یوه خصوصي ودانیز شرکت ترمنځ تړون شوی چې مالي لګښت یې د هیواد له ملي بودیجې څخه ورکول کيږي.
د یاد پُل له جوړیدو سره به د نیمروز او هرات ولایتونو د اوسېدوونکو د تګ راتګ ستونزې هوارې او همدارنګه به د حاجي جانان، سرشله، محمد یونس، حاجي حاکیم، خان، محمد سفر، حاجي محمد، حاجی عبدالله کلاچه، نارانی او محمد ایوب اوزبک زی کلي اوسیدونکې ترې ګټه واخلي.
