ټولګټو وزارت د غزني - مقر سړک د کار د چټکتیا په موخه یو تخنيکي پلاوی ټاکلی
د ټولګټو وزارت د سرپرست محترم الحاج ملا محمد عیسی ثاني، په لارښوونه د دغه وزارت تخنیکي رئیسانو هر یوه:
د سړکونو د ساتنې او څارنې رئیس انجنیر عبدالواسع صابري، د لابراتوارونو رئیس انجنير پادشاه قيامي او د پروژو د تضمين کیفیت رئیس انجنير ذبيح الله نادري، غزني ولايت ته سفر وکړ او د کابل - کندهار لویې لارې اړوند د غزني - مقر سړک پروژې د ترميم او بیا رغونې کار څخه یې له نیږدې لیدنه او څارنه وکړه.
یاد تخنيکي پلاوې د سفر موخه؛ د غزني ۔ مقر پروژې څخه څارنه، د کار چټکتيا، د تخنيکي ستونزو حل، د خلکو د ستونزو حلول، د سړک په بېلابېلو برخو، په ځانګړي توګه د سړک په فرش، پلونو پولګوټو او بدیلو لارو باندې د عملي کار پیلول دي.
د يادونې وړ ده، چې د کابل - کندهار لويې لارې اړوند د غزني - مقر سړک، ۹۶ کیلومتره اوږدوالی لري، چې د غزني ولايت دوه سړکه څخه پیل تر مقر ولسوالۍ پورې غځېږي، چې ۴ پايې پلونه، ۱۸۰ پايې پلګوټي او لسګونه معبرونه هم پکې شامل دي.
