په بلخ ولايت کې د کشنده – زاري ولسوالیو ترمنځ ٢٨ کیلومتره سړک د جغل اچولو او هموارکارۍ چارې بشپړې شوې
د ټولګټو وزارت له لوري د بلخ ولايت د کشندې او زاري ولسوالیو ترمنځ د غځېدلي ٢٨ کیلومتره سړک د جغل اچولو او هموارکارۍ چارې بشپړې او د یاد ولایت د ټولګټو رياست رئيس الحاج مولوي عبدالصبور صابر او یو شمېر سیمه ییزو مسئولینو په شتون کې ګټې اخيستنې ته وسپارل شو.
یاد سړک، چې د بېلابېلو عواملو له امله تخریب شوی وو، د بلخ ولایت د ټولګټو ریاست د شته پرسونل او ماشینرۍ پر مټ یې د جغل اچولو او هموارکارۍ چارې د یوې میاشتې په موده کې بشپړې شوې.
د یادې پروژې د کار په بشپړېدو د سیمې خلک خوښ دي او وایې، چې د یاد سړک په ترمیم او هموارکارۍ سره د دوی شته ستونزې د پخوا په پرتله هوارې شوې دي.
