په پکتیکا ولایت کې د جاني خېل – تروه ( قمرالدین) مسیر د لومړي لاټ ۲۰ کیلومتره سړک رغنیزې چارې پیل شوې دي او عملاً جریان لري
په پکتیکا ولایت کې د جاني خېل – تروه ( قمرالدین) مسیر د لومړي لاټ ۲۰ کیلومتره سړک رغنیزې چارې د ا.ا.ا د ټولګټو وزارت او خصوصي سکتور ترمنځ د ۵۰۱ میلیون او ۶۶۰ زره افغانیو په تخمیني ارزښت قرارداد شوې دي او دا مهال عملاً جریان لري.
یاده پروژه ټولټال ۱۲۲ کیلومتره اوږدوالۍ لري چې د پکتیکا ولایت له جاني خېل ولسوالۍ څخه پيلېږي او د همدې ولایت د تروه ولسوالۍ تر قمرالدين سیمې پورې رسېږي او دا مهال یې د لومړي لاټ ۲۰ کیلومتره سړک رغنیزې چارې پيل شوې دي.
د یادونې وړ ده چې د یاد سړک رغنیزې چارې څو ورځې مخکې د پکتیکا ولایت د والي محترم ملا عبدالخالق عابد، د یاد ولایت د ټولګټو رییس محترم مولوي محمداکبر عادل، یو شمېر ځایي مسئولینو او قومي مخورو په شتون کې افتتاح او رسماً پيل شوې.
د یاد سړک د کار په جریان کې د سیمې یو شمېر اوسېدونکو ته د کار زمینه برابره شوې ده او د رغنیزو چارو په بشپړېدو سره به یې د جاني خېل او تروه ولسوالیو ترمنځ د تلونکو هېوادوالو د تګ راتګ او سوداگريزو توکو د لېږد رالېږد په برخه کې د پام وړ آسانتیاوې رامنځته شي.
