د کرکېټ بورډ اجراییه رییس د ټولګټو له وزیر سره وکتل
د ټولګټو وزیر انجنیر نجیب الله یمین د کرکېټ بورډ له اجراییه رییس ډاکټر حامد شینواري سره په لیدنه کې پر دوه اړخیزو همکاریو ټینګار وکړ.
په دې لیدنه کې د ټولګټو وزیر کرکېټ د هیوادوالو د یوالي لپاره غوره لوبه وبلله او زیاته یې کړه چې د افغانستان کرکېټ په لنډ وخت کې ډېر پرمختګ کړی خو اړتیا ده چې دا پرمختګ نور هم ګړندی وساتل شي.
ښاغلي وزیر زیاته کړه چې په افغانستان کې ډېر ځوانان د کرکېټ سره علاقه لري او له همدې کبله تکړه کسان پکې پیدا کېدی شي چې د کرکېټ بورډ پام ور اوښتل ورته اړین دی.
په ورته وخت کې د کرکېټ بورډ اجراییه رییس بیا د ټولګټو وزارت د رهبرۍ له لوري رامنځته شوي وروستي اصلاحات او پرمختګونه وستایل او زیاته یې کړه چې په کرکېټ بورډ کې هم ګڼ اصلاحات رامنځته شوي او لا هم د پراختیا په حال کې دي.
ډاکټر شینواري همدا شان زیاته کړه چې کرکېټ بورډ اوس ډېره پانګونه په لوبو کې پر غوره مدیریت او تنکیو ځوانانو کوي چې د هیواد له ګوټ ګوټ څخه مستعد کسان راپیدا او په لوبو کې چانس ورکړي.
