کاپیسا: د دانش – پل مغان سړک دریمه برخه هم په بشپړېدو ده
د کاپیسا ولایت د دانش – پل مغان دریم لاټ سړک رغنیزې چارې به په نږدې راتلونکې کې بشپړې او ګټي اخیستنې ته به وسپارل شي.
دا سړک ۵.۴۵۱ کیلومتره اوږدوالی، ۶ متره پلنوالی، په بیلابیلو اندازو کې ۶۲ پایې پُلګوټي، ۵۵ متره مکعب استنادي دیوالونه او ۳۵۳۰ متره د سړک غاړې لښتي لري.
یاده پروژه د ټولګټو زارت له لوري له یوه خصوصي ودانیز شرکت سره د څه باندې ۳۶ میلیونه افغانیو په ارزښت تړون شوې چې مالي لګښت یې د هیواد له پراختیایي بودیجې څخه ورکول کیږي.
د دې سړک د رغنیز کار پرمهال د سیمې اوسېدونکو ته ګڼ کاري فرصتونه رامنځته شوي او د کار تر بشپړتیا وروسته به یې، د ډېرو کلیو اوسېدونکو ته ټرانسپورټي اسانتیاوې رامنځته شي.
د یادونې وړ ده چې د دانش – پل مغان سړک ټول ټال څه باندې ۲۰ کیلومتره اوږدوالی لري او په دریو برخو ویشل شوی چې د لومړۍ برخې کار یې له وړاندې بشپړ شوی دویمه تر کار لاندې او دریمه برخه یې په بشپړېدو ده.
