په غور ولایت کې د ۱۰ کیلومتره سړک د جوړولو چارې ۸۰ سلنه پرمختګ لري
د چغچران – ګردندیوال څلورمه برخه سړک چې په غور ولایت کې جوړیږي، ۱۰ کیلومتره اوږدوالی او ۱۱ متره پلنوالی لري چې د افغانستان د ختیځ - لویدیځ دهلیز مهمه برخه ده.
د یادې ملي پروژې د رغنیزو چارو تړون د ټولګټو وزارت لخوا له درېیو خصوصي او ودانیزو شرکتونو سره لاس لیک شوی، چې تردې مهاله یې د رغنیز کار چارې ۸۰.۹۵ سلنه پرمخ تللي دي او ټول مالي لګښت یې د افغانستان دولت له بودیجې څخه ورکول کېږي.
د دغې پروژې د جوړېدا پرمهال د غور ولایت ګڼو خلکو ته د کار زمینه برابره شوې او د کار له بشپړ سره به یې د افغانستان د ختیځ - لویدیځ د هلیز د یوې مهمې برخه تکمیل شي او د غور ولایت اوسېدونکو لپاره به ټرانسپورټي آسانتیاوې رامنځته کړي.
د یادولو وړ ده، چې دغه پروژه د چغچران – ګردندیوال یا ختیځ - لویدیځ دهلیز له مهمو برخو څخه دی چې د ټولو برخو له بشپړیدو سره به یې د هیواد ختیځ ولایتونه له لویدیځو هغو سره ونښلول شي همدارنګه به په سیمه ییز نښلون، ټرانزیټ او د سوداګرۍ په وده کې د پام وړ رول ولري.
