د ټولګټو سرپرست وزير د قزاقستان له سفير سره وکتل
د ټولګټو سرپرست وزير محترم الحاج ملا محمد عیسی ثاني کابل کې د قزاقستان له سفير محترم عليم خان يسين ګيلدييف سره د يوشمير مهمو مسايلو په تړاو په خپل کاري دفتر کې ليدنه وکړه.
په پيل کې د ټولګټو وزارت سرپرست وزیر نوموړي ته د ښه راغلاست ترڅنګ وويل: خوښ دی، چې قزاقستان د افغانستان يو له مهمو اقتصادي او تجارتي همکارانو څخه دی.
دواړو لوريو د افغانستان د اوسپنې پټلۍ په ځانګړي ډول د خواف-هرات د څلورمې قطعې د ۴۷ کيلومتره لومړۍ برخې اوسپنيزې کرښې د پراختيا په تړاو مفصل بحثونه وکړل، ترڅو له دې لارې د افغانستان د صادراتي توکو کچه لوړه شي او اهميت ته په کتو د افغانستان او قزاقستان ترمنځ اقتصادي او تجارتي اړیکې لا پراخې شي.
د قزاقستان سفير ډاډ ورکړ، چې قزاقستاني شرکتونه د افغانستان د اقتصادي پرمختګ په برخه کې پانګونې ته چمتو دي.
د ټولګټو وزارت سرپرست د قزاقستان سفير ته اطمینان ورکړ، چې اوسمهال په افغانستان کې په بشپړ ډول امنيت تامين او پانګونې ته ښه فرصت برابر دي، نو قزاقستان بايد له دې فرصت څخه په ګټې اخيستنې قزاقستاني سوداګر په افغانستان کې پانګونې ته وهڅوي.
