د ټولګټو وزارت محترم وزیر د کنړ ولایت له یو شمېر رغنیزو پروژو څخه لیدنه وکړه
د ا.ا.ا د ټولګټو وزارت محترم وزیر الحاج ملا محمد عیسی ثاني د روانې اونۍ د یکشنبې په ورځ د یاد وزارت د یو شمېر تخنیکي رئیسانو او انجنیرانو په ملتیا د کنړ ولایت له یو شمېر رغنیزو پروژو څخه له نږدې لیدنه وکړه.
محترم وزیر صاحب د خپل کاري سفر په ترڅ کې د کونړ – غازيآباد سړک، د پشد او زیړي بابا پلونو له رغنیزو چارو څخه لیدنه وکړه او د یادو پروژو اړوندو مسؤلانو ته یې د کار د چټکتیا، غوره کیفیت او په ټاکلي وخت د چارو د ترسره کولو په موخه اړینې لارښوونې وکړې.
د کونړ – غازيآباد سړک څه باندې ۱۴ کیلومتره اوږدوالی لري، چې په اوږدو کې د یو پایه پله، یو شمېر پلګوټو او ۲۷۹۲ متره استنادي دېوالونو د رغونې چارې هم شاملې دي، چې چارې به یې د سړک جوړونې له نړیوالو معیارونو سره سم ترسره شي.
دغه راز، د پشد پل په نرنګ ولسوالۍ کې موقعیت لري، چې څه باندې ۲۰۷ متره اوږدوالی لري او چارې یې ۹۰ سلنه بشپړې شوې دي. همدارنګه، د زیړي بابا پل شاوخوا ۱۳۰ متره اوږدوالی لري، چې د یادو پلونو په رغولو سره به د خاصکونړ، نورګل، نرنګ او سرکاڼو ولسوالیو د اوسېدونکو د تګ راتګ ستونزې د پخوا په پرتله هوارې شي.
بلخوا د یادو پروژو تطبیقوونکو ټیمونو هم ډاډ ورکړی، چې د دغو پروژو چارې به په ټاکلي وخت او د سړک جوړونې له نړیوالو معیارونو سره سمې بشپړې کړي.
د یادونې وړ ده، چې د ټولګټو وزارت محترم وزیر د روان ۱۴۰۵هـ.ش کال له پیلېدو سره د هېواد په بېلابېلو ولایتونو کې د پروژو د بیا پیلېدو او روانو چارو څخه د ښه تطبیق په موخه لیدنې کړې دي.
