په سرپُل ولایت کې د څه باندې ۵۸ میلیونه افغانیو په ارزښت د سړکونو د ترمیم چارې بشپړي شوې
په سرپُل ولایت کې د څه باندې ۵۸ میلیونه افغانیو په ارزښت د سړکونو د ترمیم چارې بشپړي شوې
مرغومې ۳، ۱۳۹۹
د سرپل ولایت د ټولګټو چارو ریاست د ساتنې او څارنې څانګې لخوا په دغه ولایت کې په روان ۱۳۹۹ کال کې د څه باندې ۵۸ میلونه افغانیو په ارزښت په دریو بیلابیلو برخو کې ۴۵ کیلومتره سړکونه ترمیم شول.
د سفید خاک سړک چې د بلخاب او اندارب ولسوالیو تر منځ غځیدلی، په ځینو سیمو کې وران شوی و چې د ترمیم چارې یې بشپړې شوې، د دې سړک د لومړي لاټ پر ترمیم ۲۴ او د دویم لاټ پر هاغه یې ۱۵ میلیونه افغانۍ لګښت راغلی چې له یوه خصوصي ودانیز شرکت سره یې د رغونې تړون شوی و.
همدارنګه دوې نورې پروژې لکه د سانچارک ولسوالۍ د سبز جومات د سړک د ترمیم پروژه چې څه باندې ۱۵ میلیونه افغانیو لګښت پرې راغلی او د سرپل ـ شبرغان د لویې لارې په اوږدو کې د ۲۰۰ متره استنادي دیوالونو د بیاجوړونې پروژه د ساتنې او څارنې ادارې په وړاندیز د څه باندې ۵ میلیونه افغانیو په بدل کې جوړه شوې.
د دې پروژو لګښت د افغانستان له ملي بودیجې ورکړل شوی چې د بیلابیلو ودانیزو خصوصي شرکتونو لخوا یې چارې بشپړې او ګټې اخیستنې ته سپارل شوې دي.
د یادو پروژو د کار په بهیر کې د سانچارک، بلخاب او خاک سفید ولسوالیو اوسیدونکو ته پر کاري بوختیاوو سربیره د تګ راتګ ستونزې هوارې شوي.
د ټولګټو وزارت ـ کابل
