د ټولګټو وزير د خوست له والي او وکيلانو سره د غلام خان بندر او خوست-پکتيکا پر سړک خبري وکړي
دټولګټو وزیر د خوست والي مهمند کټوازي او استازي غفار خان تڼي ته ډاډ ورکړ، چې د بودیجې سره سم به د هغوی مهم سړکونه ورته ورغوي او زیاته کړه چې د غلام خان بندر ته غځېدلی سړک باید په دوه لاینه او بنسټیزه توګه جوړ شي.
د خوست والي او استازو ویل خوست ته د سولې ولایت نوم ورکولو په درشل کې دي او د دې لپاره اړتیا ده چې پاخه سړکونه ولري تر څو هېوادوال هلته د سیاحت لپاره لاړ شي.
د خوست استازو دا غوښتنه هم وکړه چې ټولګټو وزارت دې د غلام خان بندر ته غځېدلی سړک ورته ورغوي ځکه دا یوه عایداتي سرچینه ده.
د ټولګټو وزیر ښاغلي یمین ډاډ ورکړ چې خوست ته یې پلاوی استولی تر څو د سړکونو د اړتیاوو رپوټ ورته راوړي چې پر اساس به یې یو شمېر سړکونه سروې ډیزاین او نورو پړاونو ته ولاړ شي او د غلام خان بندر ته د غځېدلي سړک لپاره اوس مهال د سروې او ډیزاین په برخه کې مرسته کولای شي خو د رغونې لپاره یې کافي بودیجه نشته.
په دې لیدنه کې د خوست پکتیکا تر منځ هم د یوه سړک پر جوړېدو خبرې وشوې چې دا ټولګټو وزارت ته مهم دی ځکه خوست د پکتیکا له لارې له غزني او له هغې لارې نورو سویلي او لودیځو ولایتونو سره نښلولی شي. دا سړک لویې بودیجې ته اړتیا لري چې د دولت په کچه باید په لومړیتوبونو کې راوستل شي.
د خوست استازي غفار خان تڼي د ټولګټو وزير ښاغلي انجنیر نجيب الله يمين ته ژمنه ورکړه چې د سړکونو تر جوړېدو وروسته به یې خوستیان د ساتنې لپاره هر ډول مرستې او ستړیا ته چمتو وي.
په ورته مهال د ټولګټو وزیر د خوست له والي او استازي څخه دا غوښتنه وکړه، چې د وزن د کنټرول په موخه دې د خوست با فرهنګه خلک په رضاکارانه توګه له تلو څارنه وکړي. دا مهال په خوست کې د وزن د کنټرول یوه تله شته چې دا به هم مناسب ځای ته انتقال او د بودیجې په پیدا کولو سره به بله تله هم ورته منظور شي.
کب ۲۵مه، ۱۳۹۹
