بهرني پانګه وال د هېواد د سړکونو او اوسپنې پټلۍ رغونې په برخه کې پانګونې ته ليواله دي
د ټولګټو وزارت سرپرست وزیر محترم الحاج ملا محمد عیسی ثاني د ترستکو میدل ایست(منځني ختيځ) شرکت د بهرنيو اړيکو له رئيس محترم دوکتور درخشان سره په خپل کاري دفتر کې وکتل.
په یاده لیدنه کې د ترستکو میدل ایست( منڅني ختیځ) شرکت د بهرنيو اړيکو رئيس د ټولګټو وزارت د سرپرست وزير سره له ليدنې څخه خوښي څرګنده کړه او زياته يې کړه چې «زموږ ( Trustco Middle East GmbH) شرکت د سړکونو او اوسپنې پټلۍ د جوړولو او د معدنونو په برخه کې پراخه تجربه لري او غواړو چې د ټولګټو وزارت سره د سرک جوړونې او اوسپنيزې کرښې د رغونې په برخه کې ګډکار وکړو.»
د ټولګټو وزارت سرپرست وزیر د ترستکو میدل ایست شرکت رئيس ته د ښه راغلاست تر څنګ د دوی له ليوالتيا څخه مننه وکړه او زياته يې کړه چې « دامهال په افغانستان کې تر بل هر وخت امنيت ښه شوی او په بېلا بېلو برخو په ځانګړې توګه د سړک او اوسپنيزې کرښې په برخه کې کورنيو او بهرنيو پانګوالو ته د پانګونې بشپړه زمينه برابره ده.»
همدارنګه، د ټولګټو وزارت سرپرست وزیر د خپلو خبرو پر مهال دا هم و ويل چې ستاسې وړانديزونه به د ا.ا.ا له رهبرۍ سره شريک کړل شي او وروسته تاسو کولای شئ چې د پالیسۍ سره سم د ياد وزارت په پروژو کې برخه واخلئ.
دا په داسې حال کې ده، چې په دې وروستيو کې يو شمېر نورو بهرنیو پانګوالو هم د هيواد د سړکونو او اوسپنيزې کرښې په برخه کې پانګونې ته ليوالتيا ښودلې وه.
د ټولګټو وزارت رسنیز دفتر
