د تخار - بدخشان لویې لارې د ترميم او بيا رغونې کار د څه باندې ۱۵.۹ ميليونه افغانيو په ارزښت پيل شو
د تخار - بدخشان لویې لارې؛ د ترميم او بيا رغونې کار د ټولګټو وزارت له لوري د تخار ولايت د ټولګټو د رئیس او ځينو سيمه ییزو مسولينو په شتون کې د پټۍ په پريکولو سره افتتاح او پیل شو.
دغه سړک، ۵۸ کيلو متره اوږدوالی لري، چې د ویجاړو برخو پر ترميم سربېره د ۱۵۰ مترو په اوږدوالي سره یو پایه پل، ۸ پايې پلګوټي، ۲۰ متره معبر (واش)، ۴۰ متره ډبرین استنادي دېوال او ۱۴۸ متره ګابیوني دېوال شامل دي چې ترميم او بیارغول کېږي.
ياده ترمیماتي پروژه د ټولګټو وزارت او صفت ساختماني او سړک جوړونې شرکت ترمنځ د څه باندې ١٥ میلیونه افغانیو په ارزښت سره قرارداد شوې، چې لګښت یې د ټولګټو وزارت له بودیجې څخه ورکول کېږي، چې په راتلونکو څلورو مياشتو کې به يې کار بشپړ شي.
د يادونې وړ ده، چې د يادې پروژې د کار په جريان کې به د سیمې يو شمېر اوسېدونکو ته د کار زمينه برابره شي او د کار له بشپړېدو سره به یې پر دغه مسير د تيرېدونکو خلکو د تګ راتګ ستونزې د پخوا په پرتله هوارې شي.
