د تخار د ماورای کوکچه سړک رغنیز کار دوام لري
د تخار ولایت د ماورای کوکچه سړک چې ټولټال ۱۴۴ کیلومتره اوږدوالی لري، د آی خانم بندر د بهارک، خواجه غار، دشت کلا، خواجه بهاوالدین، ینګی کلا او چاه آب ولسوالۍ له لارې د تخار ولایت له مرکز تالقانو ښار سره نښلوي.
دا سړک چې په شپږو برخو ویشل شوی، چې اوس مهال یې څلور برخې تر رغونې لاندې دي او پاته دوه برخې یې د ټولګټو وزارت په راتلونکې پلان کې شامل دي.
د یاد سړک لومړی برخه د خواجه غار او دشت کلا ولسوالیو ترمنځ غځېدلی چې ۱۷ کیلومتره اوږدوالی، ۷.۲ متره پلنوالی، ۱۴ پایې پلګوټي لري چې تر دې مهاله يې رغنیز کار ۲۱.۴۰ سلنه پرمختګ لري.
دوم لاټ یې، له دشت کلا ولسوالۍ څخه پیل تر خواجه غار ولسوالۍ پورې غځیدلی چې ۲۲.۷ کیلومتره اوږدوالی، ۷.۲ متره پلنوالی لري او تر اوس مهاله يې د جوړونې کار ۲۹.۹ سلنه کاري پرمختګ لري.
دریم لاټ یې، له خواجه بهاوالدین ولسوالۍ څخه تر ینګي کلا ولسوالۍ پورې غځیدلی چې ۲۸.۶۱۵ کیلومتره اوږدوالی او له ۷.۲ تر ۲۰ مترو پوري پلنوالي لري او تر دې مهاله یې د جوړلو کار ۴۹.۴ سلنه بشپړ شوی.
همدارنګه د یاد سړک څلورم لاټ، له ینګي کلا ولسوالۍ څخه پیل تر چآه اب ولسوالۍ پورې د ۲۷.۰۳۶ کیلومترو په اوږدوالي سره غځیدلی چې ۷.۲ متره پلنوالی او په بیلابیلو اندازو کې ۵۵ پایې پلګوټي او ۲۵۶۰ متره استنادي دیوال لري، تر دې مهاله یې د جوړلو چارې ۴۱.۷۲ سلنه مخته تللي.
د یادو پروژو له پلی کیدو سره به خلکو ته پر کاري بوختیاوو سربیره ترانسپورتي ستونزې هم هواري شي، همدارنګه اقتصادي وده او د ژوند چاپیریال ښه والی له ځان سره لري.
د ټولګټو وزارت ـ کابل
