د سړکونو د ساتنې او څارنې معین جنوب غربي ولایتونو ته د سفر په لړ کې له بېلابېلو حفظ او مراقبتي پروژو څخه لیدنه وکړه
د ټولګټو وزارت د سړکونو د ساتنې او څارنې معین محترم الحاج معاون ملا عبدالجبار، چې یو تخنیکي ټیم یې ملتیا کوي؛ جنوب غربي ولایتونو ته د خپل کاري سفر په ترڅ کې نيمروز ولایت ته سفر وکړ او هلته په رسېدو سره یې د یاد ولایت د کنګ ولسوالۍ اړوند سرشیله پُل، د زرنج - دلارام سړک د تخريب شويو برخو، او د ابریشم پل او غځېدلي سړک څخه؛ چې افغانستان او ایران سره نښلوي لیدنه وکړه همدارنګه یې د چګني کمپ له شته وسايطو او ماشینري، د غورغوري کمپ له وسايطو او تجهيزاتو څخه لیدنه وکړه او د غیر فعالي ماشینري د فعالولو او ترمیم په موخه یې اړوند مسؤولینو ته لازمې لارښوونې وکړې.
په ورته مهال، د ټولګټو وزارت د سړکونو د ساتنې او څارنې معین، فراه ولایت ته په سفر کې د میل ۷۸ شیخ ابونصر فراهي سړک او د پشتکوه ولسوالۍ د کلايکا ترازو څخه د ليدنې تر څنګ ېې د ياد ولايت د بکوا ولسوالۍ له قومي مخورو سره هم ولیدل او د هغوی ترانسپورتي ستونزې او وړاندیزونه یې واورېدل، چې د سړکونو د ساتنې او څارنې محترم معین صاحب له لوري د ستونزو د هوارولو ډاډ ورکړل شو.
همدارنګه د سړکونو د ساتنې او څارنې معین، د کندهار – هلمند لویې لاریې اړوند د (هلمند دوه لارې – ګرشک بازار او هلمند دوه لارې – لښکرګاه) سړکونو او هلمند – هرات لویې لارې اړوند (ګرشک بازار – سنګلام) سړک څخه لیدنه وکړه او د ترمیم او بیارغونې په موخه یې اړوند مسؤولینو ته لارښوونې وکړې.
