د ټولګټو وزارت سرپرست په کاپيسا ولايت کې د دغه وزارت تر کار لاندې پروژو څخه ليدنه وکړه
د ټولګټو وزارت سرپرست محترم الحاج ملا محمد عیسی ثاني په داسې حال کې چې د دغه وزارت ځينو رئیسانو يې ملتيا کوله، کاپیسا ولايت ته په یوه رسمي سفر کې د دغه وزارت له پروژو څخه نظارت او ليدنه وکړه.
په ياد سفر کې؛ دټولګټو سرپرست، له ګلدان څخه تر ګلبهاره د ۱۶ کيلو متره سړک او استنادي دېوال د ترمیم او رغونې، له ګلدان څخه تر تپه احمد بيکه د ۶ پايې پلګوټو د ترميم، له احمد بیک څخه تر شينکۍ دوه لارې د ۴ پايې پلګوټو د ترمیم، له پل صياد څخه تر ده باباعلي سيمې د سړک فرش د ترمیم او د تګاب ولسوالۍ د تلې ( ترازو ) د رغنیزو چارو له جريان څخه لیدنه وکړه او د پروژو د لا ښه تطبيق په موخه يې مسوولانو ته لازمې لارښوونې وکړې. دغه پروژې د ۹.۴ ميليونه افغانيو په ارزښت له بیلا بیلو شرکتونو سره قرارداد شوې دي.
همدارنګه په ياد سفر کې، د کاپيسا ولايت والي محترم قاري احسان الله بريال د ټولګټو وزارت له سر پرست سره په لیدنه کې، د ښه راغلاست ترڅنګ؛ د کار لاندې پروژو او د خلکو د ترانسپورتي ستونزو په اړه خبرې وکړې او د سروبي مسير د سړک ویجاړو برخو د ترميم، د اله سای ولسوالۍ د سړک ترميم، د ۳.۵ کيلومتره په اوږدوالي سره د بدرآب سړک د رغولو او د چورغل پل د ترميم غوښتنه وکړه.
د ټولګټو وزارت سرپرست چې د ياد سفر په ترڅ کې يې د کاپیسا ولایت د بېلابېلو مسیرونو له سړکونو څخه لیدنه وکړه او اړوندو مسوولینو ته یې لارښوونه وکړه، چې د هغو پروژو کار دې د مالي بودیجې په نظر کې نیولو سره په پلان کې شامل کړي، چې د یاد ولایت د محترم مقام، او قومې مخورو یې غوښتنه کړي وه.
د یادونې وړ ده؛ چې د بشري سرچينو رئیس محترم انجنیر فضل الباري بلوڅ او د وزارت؛ د مالي چارو کارپوه محترم عبدالعلیم خورشید د کاپيسا ولايت د ټولګټو ریاست د مالي او بشري سرچينو له څانګو بيا کتنه او ارزونه وکړه او د چارو د لا ښه والي په موخه يې د ياد رياست کارکوونکو ته لازمې سپارښتنې وکړې.
