د ټولګټو وزارت محترم وزیر د سالنګونو لویې لارې د اساسي بیارغونې له چارو څخه لیدنه وکړه
د ټولګټو وزیر محترم الحاج ملا محمد عیسی ثاني، چې د دغه وزارت د سالنګونو دساتنې او څارنې رئیس او د پروان ولایت د ټولګټو ریاست رئیس یې هم ملتیا کوله، تېره پنجشنبه سالنګونو ته سفر وکړ. نوموړي د یاد سفر په ترڅ کې د شمالي سالنګ او جنوبي سالنګ د اساسي بیارغونې له چارو څخه له نږدې لیدنه او ارزونه وکړه.
دغه رازمحترم وزیر صاحب په دغه سفر کې د یادې لوې لارې اړوند د ۹ پایو پلونو د اساسي بیارغونې له چارو څخه، چې د دوشي پُل په ګډون ۷ پلونه د جنوبي سالنګ اړوند او پاتې دوه پایې پلونه د شمالي سالنګ اړوندو سیمو کې موقعیت لري هم لیدنه وکړه او هدایت یې ورکړ چې ژر ترژره دې د یادو پلونو چارې بشپړې شي.
د یادې لویې لارې د اساسي بیارغونې ( کانکريټ اچونې، قیر اچونې، پلونو، پلګوتو، استنادي دیوالونو او ځینو نورو مصنوعي ساختمانونو) چارې دا مهال د شمالي سالنګ او جنوبي سالنګ په بېلابېلو برخو کې په چټکۍ سره جریان لري.
د ټولګټو محترم وزیر د یادو پروژو تطبیق کوونکو ټیمونو او قراردادي شرکتونو مسؤلینو ته د چارو د چټکتیا او غوره ترسره کېدو په هکله لازمې لارښوونې وکړې او ټینګار یې وکړ، چې د یادې لویې لارې د پلان شویو برخو چارې دې د ژمې له را رسیدو مخکې بشپړې کړي.
د قراردادي شرکتونو مسؤلینو هم ډاډ ورکړ، چې د یادو پروژو چارې به په غوره کیفیت او د پلان له مخې په ټاکلي وخت ترسره کړي.
