د ټولګټو وزیر د سالنګونو لویې لارې له کاري بهیر څخه لیدنه وکړه
د ا.ا.ا د ټولګټو وزیر محترم الحاج ملا محمد عیسی ثاني پرون جمعه د سالنګونو لویې لارې له بېلابېلو برخو څخه لیدنه وکړه.
د ټولګټو وزیر په یاد سفر کې د سالنګونو لویې لارې د دریو برخو شمالي سالنګ او جنوبي سالنګ له کانکریټي او دوشي ـ خنجان آسفالټي برخې له کاري بهیر څخه د لیدنې ترڅنګ د قراردادي شرکتونو مسئولینو او تطبیق کوونکو ټیمونو ته لارښوونه وکړ ه چې د سږ کال پلان شوی کار دې د ژمي له را رسېدو مخکې بشپړ کړي.
د یادې لویې لارې د قراردادي شرکتونو مسئولینو او تطبیق کوونکو ټیمونو ډاډ ورکړ چې پوره هڅه کوي تر څو د سالنګونو لویې الرې د سږ کال پلان شویو برخو کار له ژمي مخکي بشپړ کړي.
دغه راز د ټولګټو محترم وزیر د یاد سفر په لړ کې د سالنګونو لویې لارې د ساتنې او څارنې له ریاست څخه هم لیدنه وکړه او اړوندو کارکوونکو او تخنیکي ټیمونو ته یې لارښوونه و کړه، چې د ژمي را رسېدو پرمهال دې د سالنګونو لویې لارې لپاره بشپړ چمتو والی ونیسي.
