د کابل – جلال آباد لویې لارې د دویم لین سړک له رغنیزو چارو څخه د ټولګټو وزارت د محترم وزیر لیدنه
د ا.ا.ا د ټولګټو وزارت محترم وزیر الحاج ملا محمد عیسی ثاني، چې د یاد وزارت یو شمېر تخنیکي رئیسانو یې ملتیا کوله پرون د جمعې په ورځ د کابل – جلال آباد لویې لارې د دویم لین سړک د ۳۲ کيلومتره برخې له کاري بهیر څخه لیدنه وکړه.
د ټولګټو محترم وزیر په دې وروستیو کې د یادې لویې لارې له کاري بهیر څخه دا دویمه لیدنه ده، چې په تیره لیدنه کې یې د قراردادي شرکت مسئولینو او تطبیق کوونکو ټیمونو ته لارښوونه کړې وه، چې د سړک د چارو د چټکتیا په موخه دې د ماشینرۍ شمیر زیات کړي او اوس د کار په سیمه کې د ماشینرۍ شمېر له ۵۰ عرادو څخه ۷۰ عرادو ته زیاته شوی دی.
دا مهال د یادې لویې لارې په اوږدو کې د ځینو برخو د کیندې، پرکارۍ، د پلګوټو او استنادي دېوالونو رغنیزې چارې هم جریان لري.
د ا.ا.ا ټولګټو وزارت د قرار دادي قراردادي شرکت مسئولینو او تطبیق کوونکو ټیمونو ته یوځل بیا هدایت او لار ښوونه وکړه، دا چې یاده لویه لار یوه مهمه استراتیژیکه لویه لار ده، د رغونې چارې دې چټکې او د ټولګټو وزارت د تخنیکي مشخصاتو سره سمې او په ټاکلي وخت بشپړې کړي.
د قراردادي شرکت مسؤلانو د ټولګټو محترم وزیر ته ډاډ ورکر، چې د یادې لویې لارې د اساسي رغونې چارې به په ټاکلي وخت او د تخنیکي مشخصاتو سره سمې بشپړې کړي.
دا په داسې حال کې ده، چې د یادې لویې لارې د ۲۲ کیلومتره برخې د رغونې چارې هم جریان لري. د دغې پروژې په بشپړېدو سره به نه یوازې د درنو هېوادوالو د تګ راتګ ستونزې هوارې شي، بلکې کروندګرو او سوداګرو ته به هم د سوداګریزو او کرنیزو توکو د لېږد رالیږد په برخه کې بشپړې اسانتیاوې رامنځ ته شي.
