د کندهار- ارزګان لویې لارې د ۲۰۹ کیلومتره سړک د اسفالټ اچونې چارې پیل شوې
د کندهار- ارزګان لویې لارې د ۲۰۹ کیلومتره سړک د اسفالټ اچونې چارې د ریاست الوزراء اقتصادی مرستیال محترم ملا عبد الغني برادر، د ټولګټو وزارت د سرپرست وزیر محترم الحاج ملامحمد عیسی ثاني، د یاد ولایت د ټولګټو چارو د رئیس محترم مولوي عبدالهادي يعقوب، د لويديځ زون د پروژو مسئول محترم انجنير شير حسن خوشیوال، د خاکريز او ارغنداب ولسواليو ولسوالانو، امنیه قوماندانانو او یو شمېر نورو سيمه ايزو چارواکو او قومي مخورو په شتون کې پیل شوې.
د یاد سړک د ترمیم او بیا رغونه په دوو برخو کې چې، لومړۍ برخه یې د ۱۰۸ کیلو متره په اوږد والي سره له ارغنداب، خاکریز، او نیش ولسوالیو څخه په تیرېدو د کندهار لرغونی ولایت د ارزګان ولایت سره نښلوي چې دا مهال یې د ۱۰ کیلومتره سړک د اسفالټ اچونې چارې عملاً پیل شوې.
دغه راز د یاد سړک دویمه برخه چې ۱۰۱ کیلومتره اوږد والی لري؛ د ترینکوټ څخه پیل د دهراود ولسوالۍ تر چتو پُل سیمې پورې رسیږي، چې په نږدې راتلونکي کې به یې ۱۰ کیلو متره سړک د اسفالټ اچونې لپاره آماده شي.
د یادونې وړده چې د یاد سړک په دواړو برخو کې د یو شمېر پُلونو او پلګوټو د ترمیم او بیارغونې کار هم شامل دی چې د سړک د رغونې چارې یې د ټولګټو وزارت او احسان حکیم ودانیز او سړک جوړونې شرک ترمځ قرارداد شوي دي.
دیاد سړک په رغونې سره به د خلکو ترانسپورتي ستونزې د پخوا په پرتله هوارې شي او پردغه لویه لار تلونکي مسافران به د پخوا په پرته په آسانې سره تګ را تګ وکړي.
