د کندهار باغ پل - هلمند دوه لارې سړک د اساسي ترمیم او بیارغونه جریان لري
دغه سړک، چې ۷۹.۳ کيلومتره اوږدوالی، ۷ متره پلنوالی او ۲ متره د سړک غاړې لري؛ د کندهار ولايت له باغ پل څخه پيل د هلمند ولایت تر دوه لارې پورې غځېدلی دی.
د دغه سړک په اوږدو کې ۳ پايې اوسپنیز کانکریټي پلونه، ۲۱۸ پايې پلګوټي، ۲۱ بستره واشونه، ۳۲۰ متره د سړک غاړو لښتي او ۳۹۷ متره استنادي دیوالونو ترمیمول شامل دي، چې له دې جملې څخه ۲ پايې پلونه، ۳۳ پايې پلګوټي په اساسي ډول ترميم او ۳۴ پايې پلګوټو له سره ورغول شي.
د سړک دغه پروژه د ټولګټو وزارت او یوه خصوصي ساختماني او سړک جوړونې شرکت تر منځ د معدن په بدل کې قرارداد شوې، چې دا مهال یې د ترمیم او بیارغونې چارې جريان لري.
د يادې پروژې د کار په جريان کې د سیمې یو شمېر اوسېدونکو ته په مستقيم او غير مستقيم ډول د کار زمینه برابره شوي، چې د کار له بشپړېدو سره به یې د خلکو ترانسپورتي ستونزې د پخوا په پرتله هوارې شي او د سوداګریزو توکو په لېږد رالېږد کې به اسانتياوې رامنځته شي.
