د کندهار – سپین بولدک دویم لین سړک دویم لاټ رغنیزې چارې ۹۷ سلنه بشپړې شوې دي
د کندهار – سپین بولدک سړک د هېواد له مهمو او ترانزیټي مسیرونو څخه دی، چې د کندهار له مرکز څخه پیل د وېش بازار ترحدودو پورې رسیږي، د دغه سړک د دویم لین رغنیزې چارې له وړاندې پيل شوې وې، چې د ځینو ستونزو له امله دریدلې وې، خو د ا.ا.ا له لورې یې کار بیا پل شو، چې دا مهال یې د دویم لین د دویم لاټ رغنیزې چارې ۹۷ سلنه بشپړې شوې دي.
یاد سړک ۳۹.۶ کیلومتره اوږدوالی او په ټولیزه توګه ۱۲.۲۰ متره پلنوالی لري. د اسفالټي برخې پلنوالی یې ۱۱.۲۰ متره دی او نیم متر د سړک څنډې (شولډرونه) لري. همدارنګه، د دې پروژې په اوږدو کې د ۲پایو پلونو او ۱۴۱ پایو پلګوټو د رغونې چارې هم شاملې دي.
د دغه سړک رغنیزې چارې د ټولګټو وزارت له لوري له خصوصي سکتور سره قرارداد شوې وې او په نږدې راتلونکې کې به یې کار بشپړ او ګټې اخیستنې ته وسپارل شي.
د یاد سړک د کار په جریان کې د سیمې یوشمېر اوسیدونکو ته د کار زمینه برابره شوې ده او په بشپړېدو سره به یې د کندهار – سپین بولدک پرمسیر د تلونکو مسافرو ترڅنګ د تخته پل، ارغستان، معروف او شورابک ولسوالویو د اوسیدونکو د تګ راتګ ستونزې تر ډېره حل شي.
د یادونې وړ ده، چې د ا.ا.ا د ټولګټو وزارت د هېواد په بېلا بېلو برخو کې د ګڼ شمېر لویو او کوچنیو پروژو چارې پیل کړې دي او دامهال عملاً جریان لري، چې د یادو پروژو په ترڅ کې ګڼ شمېر هېواد والو ته د کار زمینه هم برابره شوې ده.
