په بادغیس کې د ۶ میلیونه افغانیو په ارزښت د ۱۹ کیلومتره سړک د ترمیم کار جریان لري
د ټولګټو وزارت له لوري د شاوخوا ۶ میلیونه افغانیو په ارزښت د بادغیس په بالامرغاب ولسوالۍ کې د ۱۹ کیلومتره سړک د هموار کاري، پرُکاري او چغل اچونې کار په چټکۍ سره مخ پر وړاندې روان دی.
دا سړک چې د هیواد د حلقوي سړک یوه برخه ده، د بادغیس ولایت د بالا مرغاب ولسوالۍ څخه تېریږي او ددغه ولایت غورماچ ولسوالۍ ته رسیږي چې ورسته د فاریاب ولایت د قیصار لامان پر لورې غځېدلی دی.
د دغه سړک د تخریب له امله د بادغیس ولایت اوسېدونکي په ځانګړي ډول د ژمي په موسم کې د هیواد شمال ولایتونو ته د تګ راتګ پرمهال له سختو ترافیکو ستونزو سره مخ وه، ټولګټو وزارت د خلکو یادو ترانسپورتي ستونزو د هوارولو په موخه، د شاوخوا ۶ میلیونه افغانیو په ارزښت د دغه سړک د هموار کاري، پُر کاري، او چغل اچونې کار پیل کړ، چې دا مهال د بالامرغاب ولسوالۍ اړوند د ۱۲ کیلومتره سړک د اساسي ترمیم چارې بشپړي او د غورماچ ولسوالۍ اړوند د ۴ کیلومتره سړک د ترمیم کار په چټکۍ سره دوام لري.
د یاد سړک په اساسي ترمیم سره به د بادغیس ولایت د بالامرغاب او غورماچ ولسوالیو د اوسېدونکو ترانسپورتي ستونزې هوارې شي او له شمالي ولایتونو سره به د سوداګریزو او کرنیزو توکو په لیږد رالیږ کې چټکتیا او اسانتیاوې رامنځته شي.
د یادونې وړ ده، چې بادغیس د هیواد یو له لرې پرتو ولایت دی او په تېره کې ورته د نه پاملرنې له کبله یې ډیری سړکونه خام دي او اوسېدونکي یې له ډیرو ترانسپورتي ستونزو سره مخ دي، ټولګټو وزارت هڅه کوي چې، مالي امکاناتو په د یاد ولایت د اوسېدونکو ترانسپورتي ستونزې هوارې کړي.
