په بلخ ولایت کې د بلخ – شبرغان لارې د لومړي لاټ (د کلفت بندر سړک) رغنیزې چارې روانې دي
د بلخ – شبرغان لارې لومړی لاټ (د کلفت بندر سړک)، ۲۵ کیلومتره اوږدوالی لري، چې د څه باندې ۷۵۲ میلیونه افغانیو په ارزښت، د ټولګټو وزارت او د سړک جوړونې له یو خصوصي شرکت سره د ډیزاین – بیلډ په بڼه قرارداد شوی دی او چارې یې عملاً روانې دي.
دغه سړک د بلخ ولایت د بلخ ولسوالۍ څخه پیل او د همدې ولایت تر چاهي ولسوالۍ پورې غځېدلی دی، د سړک پلنوالی ۷.۳ متره دی او په دواړو خواوو کې ۲.۵ متره د سړک څنډې (شولډرونه) هم لري.
همدارنګه، د دې سړک په اوږدو کې د ۴۱ پایو پلګوټو جوړول هم شامل دي، چې ټاکل شوې ده د ۲۶ کاري میاشتو په موده کې یې کار بشپړ او ګټې اخیستنې ته وسپارل شي.
دغه سړک د بلخ ولایت چهاربولک، بلخ، چاهي، دولتآباد او شورتپه ولسوالۍ د جوزجان ولایت د قرقین او خم آباد ولسوالیو سره نښلوي؛ چې له دې سره افغانستان د کلفت بندر له لارې له ترکمنستان سره نښلول کېږي او د دواړو هېوادونو ترمنځ د سوداګریزو اړیکو په پراختیا کې مهم رول لري.
د یادې پروژې د کار په جریان کې ۱۶۳ کسانو ته، چې انجنیران، ماهر او غیرماهر کارګران او موټرچلوونکي پکې شامل دي، د کار زمینه برابره شوې ده. همدارنګه، په دې پروژه کې ۱۱۲ بېلابېل ډوله ماشینرۍ څخه ګټه اخیستل کیږي.
