په خوست او پکتيکا کې د زلزلې ځپلو کورنيو ته د افغانستان اسلامي امارت د ټولگټو وزارت د سرپرست وزير الحاج ملا عبدالمنان عمري صاحب د تسليت پيغام:
په ډېر تأسف سره خبر سو، چې په خوست او پکتيکا ولايتونو کې طبيعي پېښه ( زلزله ) سوې ده، چې په نتیجه کې يې زموږ ډېری شمېر هيوادوال په شهادت رسیدلي او ډېری زخميان دي؛ همدارنگه د سيمې خلکو ته مالي تاوانونه هم اوښتي دي.
دې پېښې زموږ او ټول ملت زړونه دردولي دي.
له خپله اړخه د شهداء کورنيو ته تسليت ،شهيدانو ته فردوس جنت او زخميانو ته عاجل او کامل صحت غواړم.
د زيانمن شويو ولايتونو او نژدې ولاياتو ټولگټو رياستونو ته مو هدايت کړی، چې د زيانمن شويو سيمو په پاک کاري او شهيدانو په دفن کولو کې له ولايتي مسوولينو سره له هيڅ ډول همکارۍ دريغ ونکړي.
همدارنگه له ټولو داخلي او بهرنيو مسؤلو نهادونو، ټولنو او بنسټونو څخه هيله لرم، چې په دې سختو ورځو کې د افغانستان له قدرمنو خلگو سره مرستې او کمکونه وکړي.
الحاج ملا عبدالمنان عمري
د ټولګټو وزارت سرپرست
