په واما ولسوالۍ کې د کوردر پل د رغونې کار د ۱۶ ميليونه افغانيو په ارزښت بشپړ او ګټې اخيستنې ته وسپارل شو.
د ټولګټو وزارت له لوري د نورستان - کنړ عمومي سړک اړوند په واما ولسوالۍ کې د کوردر پل د ۱۶ ميليونه افغانيو په ارزښت بشپړ او د نورستان ولايت د مرستیال والي محترم مولوي فیصل مختار، د ياد ولايت د ټولګټو رياست د محترم رئیس قاري احمد نبي عادل او يو شمېر نورو سيمه اييزو مسوولینو په شتون کې ګټې اخیستنې ته وسپارل شو.
دغه پل چې ۲۶ متره اوږدوالی، ۴،۹ متره پلنوالی، دواړو خواو ته ۱۳۳۰متر مکعبه استنادي دېوالونه او ۵ متره لوړوالی لري د رغونې کار یې د ټولګټو وزارت او متحد صافي ساختماني شرکت ترمنځ د ۱۶ مليونه افغانيو په ارزښت قرارداد شوی وو.
د يادونې وړ ده چې، د یاد پل په اساسي رغونې سره به د کنړ او نورستان ولايتونو د اوسيدونکو ترانسپورتي ستونزې د پخوا په پرتله هوارې شي.
