په کابل کې د افغانستان او ازبکستان د اوسپنې پټلۍ پلاوي ترمنځ ناسته ترسره شوه
د افغانستان او ازبکستان هیوادونو د اوسپنې پټلۍ د پلاوي ترمنځ پرون په ارګ کې او نن ورځ په ټولګټو وزارت کې ناسته ترسره شوه؛ په دې ناسته کې داړو لورو هوکړه وکړه، چې له مرکزي آسیا څخه سویلي آسیا ته د اوسپنې پټلۍ غځولو په موخه د افغانستان، ازبکستان، پاکستان، روسیې او قزاقستان ترمنځ پنځه اړخیزه ناسته دوباره پیل شي او د دې ناستې پنځه اړخیز کاري ګروپونو لومړۍ ناسته به د ٢٠٢١ کال د ډسمبر میاشې په دویمه اونۍ کې په تاشکند ښار کې ترسره شي.
همدارنگه په یادو ناستو کې پريکړه وشوه چې افغانستان لوری دې د افغانستان په خاوره کې له مرکزي آسیا څخه سویلي آسیا ته د اوسپنې پټلۍ غځولو لپاره د وړاندیز شوي مسیر د سیمه ییزې کتنې په موخه بشپړ معلومات چمتو او د تاشکند په ناسته کې دې وړاندې کړي.
د ټولګټو وزارت رسنیز دفتر
