د تخار د خواجه بهاوالدین – ینګي کلا سړک ۵۰ سلنه جوړ شوی
د تخار د خواجه بهاوالدین – ینګي کلا سړک ۵۰ سلنه جوړ شوی
دا سړک د تخار ولایت له خواجه بهاوالدین ولسوالۍ څخه پیل او تر ینګي کلا ولسوالۍ پورې ۲۸ کیلو متره اوږدوالۍ لري چې رغنیزې چارې یې تر دې مهاله ۵۰ سلنه پرمختګ لري.
دغه سړک ۷ متره د موټرو د تګ راتګ لپاره اسفالټي پلنوالی، درې متره د سړک اوږې او ۴۹ پلګوټي هم لري چې په رغېدو سره به یې د یادو ولسوالیو د اوسېدونکو ګڼې ستونزې هوارې شي.
د دې سړک د رغونې تړون له دوو ودانیزو شرکتونو سره شوی چې د افغانستان د حکومت له خوا تمویلیږي او د ماوراۍ کوکچه سړک پر مسیر پرتو خلکو ته یې شاوخوا ۱۹۹ زره کاري ورځې رامنځته کړې دي.
دا سړک د ماورای کوکچه د پروژې یوه برخه ده چې په بشپړېدو سره به یې نه یوازې ۶ ولسوالۍ سره ونښلي بلکه د تخار مرکز تالقانو ښار به هم له آی خانم بندر سره چې له تاجکستان سره پر پوله پروت دی ونښلوي.
د ماورای کوچکه سړک یو له ټرانزیټي هاغو څخه دی چې افغانستان به د تاجکستان له یوې بلې نقطې سره وصل کړي او د سوداګرۍ په پراختیا او د اقتصادي وضعیت په غښتلتیا کې به مرسته وکړي.
