په کندهار ولایت ارغنداب ولسوالۍ کې د تابین پُل جوړ او رسماً گټې اخيستنې ته وسپارل شو:
د کندهار ارغنداب ولسوالۍ ترټولو لوی او مهم پُل چي په تېرو جگړو کې یې درېیمه برخه ویجاړ سوې وه، د کندهار ټولگټو چارو ریاست له لوري د دریو میاشتو په موده کي د ۴،۱ میلیونه افغانیو په لگښت جوړ او نن رسماً گټې اخيستنې ته وسپارل شو.
د یاد پُل د گټې اخیستنې په مراسمو کې د کندهار والي حاجي محمدیوسف وفا ترڅنگ د کندهار ښاروال حاجي نعمتالله حسن، د ارغنداب ولسوال ملا محمد ادم اعجمي، د کندهار والي ځانگړي استازي قاري عبدالسلام عمري، د سیمي اوسېدونکو او یوشمېر نورو مسئولینو هم حضور درلود.
په يادو مراسمو کې مسؤلينو وویل، چې دا پُل په تېرو جگړو کې ویجاړ سوی وو د ولایتي ادارې له لوري د ټولگټو چارو ریاست ته دنده سپارل سوې وه، چې دا پُل ژر تر ژره جوړ کړي، ترڅو د ارغنداب خلگو ته د تگ راتگ پرمهال اسانتیاوې رامنځته سي، په خوښۍ سره د پُل کارونه په بشپړه توگه خلاص او د خلگو پر مخ نن رسماً پرانیستل سو.
د ټولگټو چارو وزارت رسنیز دفتر
