د سړکونو د ساتنې او څارنې معین جنوب غربي ولایتونو ته د سفر په لړ کې بادغیس ولایت ته سفر وکړ
د ټولګټو وزارت د سړکونو د ساتنې او څارنې معین محترم الحاج معاون ملا عبدالجبار، چې یو تخنیکي ټیم یې ملتیا کوي جنوب غربي ولایتونو ته د خپل کاري سفر په ترڅ کې بادغیس ولایت ته ورسېد.
د ټولګټو وزارت د سړکونو د ساتنې او څارنې معین، د کابل – کندهار لویې لارې په اوږدو کې د ټولګټو وزارت له بېلابېلو تر کار لاندې حفظ او مراقبتي
پروژو څخه د لیدنې ترڅنګ په یادو ولایتونو کې له شته ماشینري او کمپونو څخه لیدنه وکړه، هغه همدارنګه په یادو ولایتونو کې د پروژو د تطبیق څرنګوالی، د ټولګټو ریاستونو اړوند د روان او تېر کال تر کار لاندې او بشپړي شویو پروژو اړوند اسناد چک او وارزول.
هغه همدارنګه بادغیس ولایت ته په رسېدو سره د یاد ولایت له حلقوي سړک، بادغس ولایت مقر ولسوالی د ترکانو د کمپ څخه لیدنه وکړه او همدارنګه یې د بادغیس ولایت د ټولګټو ریاست له فني او مسلکي کارکوونکو سره هم ولېدل او د هغوی ستونزې او وړاندیزونه یې واورېدل.
د ټولګټو وزارت د سړکونو د ساتنې او څارنې محترم معین صاحب؛ د ستونزو د هوارولو ډاډ ورکړ او زیاته یې کړه، چې د وطن ابادي او د نظام ملاتړ زموږ او ستاسو هڅو او رښتیني کوښښ ته اړتیا لري، هغه د یاد ریاست کارکوونکي اړوند دندو ته متوجه کړل او لارښوونه یې وکړه، چې ورسپارل شوې دندې په پوره صداقت او ایماندري سره ترسره کړي.
